近排旅遊業醜聞接二連三，香港臭名遠揚，搞到有內地同胞話要杯葛香港添。為咗整頓業內歪風，挽回旅客信心，商務及經濟發展局局長劉吳惠蘭帶隊上京求救，卒之與國家旅遊局達成多項共識。不過，如果港府以為咁樣就可以解決問題，杜絕劏客醜聞，咁就真係太傻太天真喇。
所謂共識，不外乎加強監管、做好規範、加強宣傳等等，又係舊瓶新酒，完全冇新意。咪話功夫茶篤爆，今次不過係雙方合演嘅一場公關騷，大家當睇戲好喇，千祈唔好咁認真。其實，中港合作、加強監管、做好規範，呢啲道理人人都識，問題係，到底兩地點樣合作、點樣監管、點樣規範呢？如果又係吹水唔抹嘴，嗰頭吹，嗰頭散，咪又係嘥氣！
國家旅遊局局長邵琪偉話喎，希望內地旅客理性消費，唔容許存在零團費，會堅決查處違規嘅旅行團。其實，內地旅行團亂象千絲萬縷，問題又點只零團費？以上次「激死旅客」事件嚟講，每位團友盛惠一千七百幾，話多唔多，話少亦唔少，絕對唔係零團費，咪照樣出事？
講到底，求人不如求己，香港旅遊業不斷爆出醜聞，最大嘅問題始終出喺香港。近年，香港旅遊業陷入惡性競爭，唔少旅行社明知內地團有問題都照接，由於收費低過成本，劏客成為佢哋最主要嘅收入來源。於是乎，旅行社、黑導遊、黑店形成劏客食物鏈，成個行業好似無王管咁，烏煙瘴氣，亂象叢生，唔出事就奇。
最奇嘅係，黑店開到成行成市，旅遊業醜聞一而再、再而三發生，當局依然詐傻扮懵，淨係識得北上求助，一味寄望阿爺出手，幫香港解決問題。劉吳惠蘭話喎，當局不排除必要時會立法規管導遊行業，但係要等專責小組完成研究，有具體建議時先至考慮，然後再作決定。
研究復研究，蹉跎再蹉跎，呢啲就係港府嘅一貫作風喇，最怕佢哋仲未研究完，唔知又會爆出幾多醜聞。激死旅客、辱罵旅客、遺棄旅客，統統有齊啦，下次又有乜嘢新猷呢？
開講有話，香港官員冇嘢叻，最叻就係伸手，ＣＥＰＡ、個人遊、人民幣結算、國企來港上市等等，永不落空；甚至連對抗沙士，都要內地免費提供口罩等醫療物資，簡直羞家。家陣旅遊業問題多多，港府自己唔去改善監管，堵塞漏洞，又係「北望神州」，搵阿爺打救。喂，香港係實行「港人治港」，唔係「京人治港」，再咁落去，不如索性叫中央派人管治香港啦，笨！