求學不是求瞓街　報讀安排太失敗

中學會考就快放榜嘞，由於今年係最後一屆，末代會考生冇機會重讀重考，所以造就專業教育學院（ＩＶＥ）十分吃香，吸引會考成績唔係咁理想嘅同學仔報讀。既然學額矜貴，估計僧多粥少，原校生擔心學額不足，咁點算呢？香港人就以最傳統嘅方法爭取，一於日日夜夜展開排隊馬拉松耐力鐵人賽。

講到呢度，有必要稍稍修正。今時今日買樓通常已經唔使排隊，改為比較文明嘅派籌。至於盂蘭節派米咯喎，由於經常出現熱暈公公婆婆嘅慘痛教訓，甚至乎試過搞出人命，所以派米方法亦已經改為相當人道嘅上門直送。由此可見，瞓街排隊呢家嘢係蠻荒世界嘅原始行為，同學仔點解有失斯文咁唔文明嘅呢？

計功夫茶話齋，與其話同學仔唔文明，不如話專業教育學院荒天下之大謬，佢哋居然話報讀嘅方法係「先到先得」！

喂，你話先到先得吖嘛，即係並非以成績論英雄啦，擔心讀唔到書嘅學生哥當然二話不說飛身撲出，擔櫈仔掗頭位排咗隊至算。

由於校方荒謬，所以導致更加荒謬嘅另類人文風景線。有人全家總動員不惜搭篷露宿輪流排隊，有人江湖救急吹雞叫齊死黨老友接力，最令功夫茶Ｏ晒嘴嘅係，長長人龍之中居然出現腹大便便嘅孕婦。你知啦，最近酷熱天氣辣到跳舞，一不小心趴街隨時灼傷，間中又整個傾盆大雨落湯雞，好話唔好聽日曬雨淋搞到一屍兩命咪好大劑？

眼見ＩＶＥ分校到處都係瞓街人龍，校方居然又鐵石心腸，唔肯開放校園畀同學仔排得舒服少少，硬係闊佬懶理任得佢哋喺街邊食塵。

好嘞，如果大家覺得成件事已經夠晒荒謬絕倫，荒腔走板嘅反高潮出現嘞。職業訓練局話喎，唔鼓勵學生提早排隊，選科次序由成績決定，先到先得只不過係傳聞啫，唔係真嘅。

嘩！有冇咁大整蠱呀？如果唔係先到先得，因乜事幹唔早響呀？點解要等到同學仔闔府統請捱生捱死捱通宵先至有呢個「遲來的澄清」呀？

有人或者會提出一個陰謀論，職業訓練局九成好似賣樓地產商，人為製造排隊場面自抬身價。當然啦，陰謀論無法證實，唯一可以肯定嘅係，瞓街排隊天怒人怨，話唔定會有不愉快事件發生，淨係打尖已經可以帶來敵我矛盾。

講真，功夫茶唔敢肯定報讀安排到底係唔係先到先得。不如咁嘞，教育局直接介入，盡快補鑊，以正視聽，唔好畀職業訓練局繼續玩殘學生。

總而言之，求學不是求瞓街，報讀安排太失敗，唔該教育官僚高抬貴手，誤人子弟都唔好誤到中暑或者淋病吖！