喺香港，要享受港府提供嘅服務，原來係要先付出代價，例如畀人當「人球」咁掟來掟去，係咪好奇怪呢？
話說衞生署現有十二間學生健康服務中心，為全港超過七十萬中小學生提供體檢等多項健康服務，呢項服務本來都幾好嘅，事關同學仔嘅健康，梗係要規劃得企企理理啦。可惜任何好事由呢個政府去做，十居八九都會走樣，甚至變成擾民鬧劇。
呢，今年九月新學年起，荃灣區幾千名學童要跨區去屯門接受體檢。有人可能會問，南葵涌唔係有間學生健康服務中心咩，點解要捨近求遠呢？講起來真係得啖笑，原來南葵涌學生健康服務中心要留畀東涌嘅同學喎。
住荃灣嘅入屯門，住東涌嘅入葵涌，學生變「人球」，全港大兜亂，你話係咪九唔搭八吖。最慘係山長水遠，搭車來回起碼成粒鐘，辛苦唔在講，小朋友年紀太細，仲要家長請假陪足全程，費時失事，簡直係靠害。
衞生署話喎，東涌發展迅速、人口增加，只能安排該區學童去最近嘅南葵涌接受服務，由於嗰度面積有限，冇辦法增加人手，惟有要求荃灣嘅同學轉用屯門服務中心；又話增設服務中心籌備需時，唔可以因為每區人口變動話加就加。
唉，東涌新市鎮已經有十幾年歷史，人口亦唔係一夜之間翻幾番，咁耐都未有學生健康服務中心，點講都唔通喇。再講，南葵涌服務中心冇空間擴充，即係面積太細啦，當局點解唔未雨綢繆，而係等到中心爆棚至臨急抱佛腳，將學童踢入屯門吖？咁搞法，日後學生豈不是要去深圳做體檢？講到尾，都係因為政府無能又縮骨，既唔肯增加新設施，又唔去擴充舊設施，資源投放不足，咪搞到依家咁，八個蓋冚十個煲囉。就以東涌嚟講，當局Ｎ年前已經話要起醫院，到依家仲係無影無蹤。
講開又講，政府一向該做嘅唔做，唔該做嘅就亂嚟。就講番衞生署，豬流感殺到，班高官騰晒雞，買咗三百萬劑疫苗，點知因為錯判疫情，疫苗冇人吼，用剩二百八十萬劑，遲啲統統要送去堆填區，兩億幾公帑就咁揼落鹹水海。
查實，政府浪費公帑嘅醜聞數不勝數，例如，每年使近二千萬成立嘅「樹木辦」，原來係冇牙老虎，危樹一樣冧完又冧；又例如，設計新飛龍標誌，加三條綵帶咁大把就使咗六百幾萬，仲要睇到人一頭霧水；仲有吖，每年使幾千萬請班副局長同政治助理返嚟，既唔睇得又唔打得，仲不時添煩添亂幫倒忙。
你話嘞，如果慳番呢啲公帑，增加幾多間學生健康服務中心都得啦，到時班學童咪唔使咁頻撲囉。唉，教育改革朝令夕改，學生畀當局當白老鼠，依家仲要畀衞生署當波咁踢，唔該班高官做嘢用吓腦，唔好再搵學生嚟開玩笑啦！