內地同胞創意澎湃，生意腦筋勁到無倫，近來居然興起一種「捱罵生意」，全國至少有一百間「捱罵公司」。顧名思義捱罵生意即係任鬧唔嬲，滿肚怨氣想發洩心頭之恨嘅客人想點鬧就點鬧，出言侮辱又得，人身攻擊亦得，即使無理取鬧一樣無任歡迎。收費其實唔算貴，單向捱罵每十分鐘只收一元，雙向對罵就貴少少，畢竟接客嗰個要付出相當吃力嘅口舌之勞吖嘛。
計功夫茶話齋，假如食衞局局長周一嶽日後夠鐘退休或者提早落台，不妨考慮開番一間捱罵公司，因為熟能生巧，早已變成專家。反正花名都叫做「周一鑊」咯，即係周周孭鑊、日日捱罵、時時受靶，周一嶽絕對有資格成為捱罵生意嘅業界翹楚。
呢嗱，今日又要鬧一鬧周一鑊，事關再有無辜小市民慘死於僵化嘅醫療系統之下！
有一位六十一歲吳玉梅女士喎，右邊牙肉腫痛走去睇私家醫生，懷疑患上牙瘡，醫生話「細菌上腦分分鐘死人」，所以寫咗一封緊急轉介信，叫吳女士即刻去醫院刮膿。吳女士走去將軍澳醫院急症室求診，以為帶住私家醫生寫嘅緊急轉介信應該可以得到即時處理啦，哈，點不知護士將佢分流為半緊急嘅第四類別。明明係緊急，竟然降格為半緊急，原因係乜呢？功夫茶當然唔知啦，淨係知道一個令人非常震驚嘅事實，心急求診嘅吳女士輾輾轉轉走咗去廣華醫院，時間係七月十三日凌晨零時，到咗同日中午時分，吳女士神志不清發高燒，最終多個器官衰竭以及腦死。家人百般無奈之下，七月十五日同意醫生拔喉，吳女士就此與世長辭。
大家係咪同功夫茶一樣覺得震驚？牙瘡啫，諗都未諗過足以奪命。更加震驚嘅係，喂，普通老百姓就話唔知牙瘡嘅威力啫，專業嘅私家醫生知喎，而且寫咗一封緊急轉介信要求即刻刮膿，將軍澳醫院居然掉以輕心，一嘢評定為半緊急，卒之延誤救治搞出人命，你話唔震驚就假嘞！
所以話啫，作為全港醫療系統一哥嘅周一嶽真係抵鬧㗎，試問，喺佢老哥胡亂管治之下香港嘅醫療失誤有幾多？請恕功夫茶記憶力不濟，真係多到手指腳趾加埋都數唔晒。總而言之，一句講晒，醫療失誤已經太多，再多一單都係罪過。
對於母親無辜枉死，吳女士嘅長子質疑將軍澳醫院急症室護士：「點解佢唔問吓醫生？係咪佢覺得冇事就可以草菅人命？」幼女同樣不滿指摘：「冇可能無視醫生轉介信，明明講咗咁緊急，點解會係半緊急？如果早啲治療，結果又點會係咁？」
正所謂，急驚風遇着慢郎中，今次又係活生生嘅血的教訓。醫護人員慢條斯理漠視病人安危，結果急病變冇命。
所以話啫，周局長轉行擔任捱罵專家絕對係應有之義。首先，行行出狀元，捱罵專業裏面周局長認咗第二冇人敢認第一；其次，醫者父母心，周局長假如真係有心救人，唔做局長改為從事捱罵服務業肯定功德無量，無辜病人可免枉死吖嘛！