潮流興航拍，本地唔少發燒友鍾意遙控無人機，天空海闊任拍唔嬲，連政府重地如監獄及軍營都夠膽照闖。之不過，香港航拍無王管啫，唔代表其他地方亦係咁，正所謂各處鄉村各處例，入境問禁，否則隨時誤墮法網惹到一身蟻呀。
唔係亂噏o架，一名港男日前喺柬埔寨遊玩時，可能唔知當地規矩，佢使用航拍機飛越王宮，搞到當地警方如臨大敵，當事人一度被拘留。雖然經查問後獲得釋放，但乘興而去，敗興而回，睇怕乜癮都冇晒咯。
係人都知，柬埔寨有唔少著名古蹟，萬一航拍機失靈從天而降，唔止會傷及遊人，最大劑嘅係，分分鐘會破壞世界文化遺產添，真係補都補唔番。所以金邊市政府喺今年二月頒令，任何人未經許可下，不得喺市內使用航拍裝置。當地嚴厲執法，實在係無可厚非。
其實航拍機問題多多，好似製造噪音、侵犯私隱、危及居民安全等等，早就備受詬病，世界各地已經紛紛堵塞漏洞嘅嘞。好似港人熱門旅遊目的地之一嘅日本吖，早前推出航空修正案，規管無人機喺特定政府建築及人多密集地區上飛行；美國政府亦計劃規管航拍機，用家必須向當局註冊，確保出事時可以追究責任。至於鄰近嘅中國內地、台灣以及新加坡等地方，亦有管制航拍機嘅法例，如果航拍發燒友事先未做足準備工夫，收集資料，出境航拍真係分分鐘出事o架。
反觀香港，話就話係國際都會，居然連柬埔寨都不如，目前冇任何法例規管航拍活動，只係將消閒航拍機歸類為無線遙控飛機，而且完全冇禁飛區同飛行高度限制。查實相關條例喺九十年代訂立，美酒就話愈舊愈醇啫，咁舊嘅法例，早就不合時宜啦，講真，航拍機侵犯私隱算係小事喇，萬一不法分子甚至恐怖分子利用航拍機為非作歹，後果不堪設想o架。
老實講吖，要立例規管航拍機話都冇咁易啦，點解人哋做得到，香港做唔到？咪就係因為港產官僚作風因循苟且，無與時並進囉。再舉個例吖，家陣以手機程式召車服務大行其道，本來係發展創新科技最好時機。可惜吖，港產官僚唔止無盡快檢討法例，反而高調出手打擊，搞到爭議四起，添煩添亂，港府仲背負阻礙科技發展嘅污名，呢啲咪就係唔衰攞嚟衰囉。
講到底，航拍機唔同跳飛機，絕對唔可以當兒戲，點可以冇監冇管o架。計功夫茶話齋，唔怕一萬，就怕萬一，港產官僚唔及早拆彈，唔止引起更大爭議，遲早仲會爆大鑊呀！