煲呔曾最後一份施政報告猛開期票，更為咗份唔合格嘅施政報告塗脂抹粉，佢明晚七點會上網現身「時事Q&A」，回應網民提問。特首辦以往都搞過幾次「時事Q&A」，但都係官方主辦，但今次就搵來出咗名「河蟹」發問者提問嘅青協幫手，難怪網民紛紛唱衰煲呔曾。
特首辦喺社交網站facebook推銷呢次活動，好快就有網民迅速回應，十居其九都係鬧衰煲呔曾。煲呔曾日前喺立法會發爛渣爆出「黑社會」同「爛仔」論，網民就寸佢話：「問你嘢，你又唔高興？一陣屈我係爛仔、黑社會，叫禿鷹（警務處處長曾偉雄）拉我咪×街？」另一網民就單刀直入，叫煲呔曾回答點解委任民望咁低嘅林瑞麟做政務司司長；有網民更心灰意冷話：「問你又唔會答，你出嚟做乜？」
其實網民嘅憤怒同憂慮不無道理，煲呔曾面對立法會議員提問尚且會顧左右而言他，但面對冇權冇勢嘅網民只會變本加厲，加上今次搵埋組織幫佢「河蟹」晒啲問題，咁佢就唔使怕尷尬啦！煲呔曾尋日仲喺電台節目中死撐自己唔善於表達感受，所以先至會黑面喎。實情係佢喜怒形於色至真，一遇到不滿就黑面畀人睇。