土木工程拓展署助理署長（行政）陳志明早前發咗個電郵畀班同事，呼籲身為建造業界一分子嘅同事捐款畀「建造業關懷基金」，幫助啲因為工地意外而不幸過身嘅工人家庭，仲鼓勵大家慷慨解囊，將政府派畀市民嘅六千元捐出嚟添。不過，電郵發出冇幾耐，就畀人話佢強迫同事捐錢，真係好心做壞事。
陳志明上月底向同事發咗封電郵，話工地意外嘅新聞時有聽聞，今年土木工程署自己轄下嘅地盤都發生過嚴重事故，導致有工人死亡。陳志明就呼籲同事為有需要嘅家庭提供經濟援助，向「建造業關懷基金」捐款，今年嘅籌款目標係一千萬元咁話，而基金至今已經籌到六百萬元架喇。
不過，唔知點解陳志明封電郵傳傳吓就畀人話係強迫同事捐款，其實睇番封電郵，裏面講明呢次籌款係自願性質，並冇強迫同事嘅意思。
明明係想做善事，結果都搞出個大頭佛，唔知道陳志明會唔會自嘆今次真係唔衰攞嚟衰呢？