政情：黃碧雲騎劫座談會拉票
本身研究開女權問題、報咗名參選九龍城區議會黃埔東選區嘅民主黨成員黃碧雲，尋日以學者身份出席中大一個關於性別平等政策嘅座談會時話，本港女性好少參與政治，但喺社區活動嘅其實係家庭主婦多，社會為咗提高女性嘅參政比率，好應該喺下個月舉行嘅區選投佢一票喎！
黃碧雲咁講法唔單止有啲牽強，仲有將成個學術座談會騎劫，可能要計選舉經費添。就算黃碧雲真係言之成理，佢查實都冇咩優勢，因為同佢同區參選嘅，係有「鼠王芬」之稱嘅梁美芬，除非佢唔當鼠王芬係女人啦？
晨運撞鼠王芬唔尷尬
黃碧雲又透露，自己近排喺黃埔嘅公園晨運兼拉票時，不時都撞到鼠王芬。問佢覺唔覺得尷尬，佢就話︰「鬼叫黃埔得一個公園咩，佢可以去公園晨運，我都可以去o架！」睇佢真係好憎鼠王芬。同兩名女將同區參選嘅，仲有選民力量成員「星屑醫生」歐陽英傑。