煲呔曾要不是自爆來自警察世家，老朽一定以為佢來自戲劇世家。事關佢在議事堂上演對住隻雞蛋狂呼「好驚」，與一臉錯愕的「呢度唔係黑社會地方」，當年的吳楚帆都要行埋一邊！佢仲喺《香港家書》話自己唔善於表達內心感受，所以才成日「面黑」！
虛偽得佢啊！煲呔曾最識表達感受就真。記得佢知道老董腳痛下台，自己得米時吹着口哨個得戚樣嗎？成個「一色杏花紅十里，新郎君去馬如飛」咁款，差在未跳「智取威虎山」，你話佢識唔識表達內心感受？
立會答問，煲呔曾又可以理曲詞強，大聲啲都當你爛仔，睇你唔順超就係黑社會。佢喺施政報告又自詡為「繼往開來」，其實開咗無數期票，埋下不少地雷等下屆特首歎。佢仲識運用數字藝術，列舉了一大堆數字，由經濟總量、就業人口、港人平均壽命延長三年……都係佢嘅功勞。
講到養生呢家嘢，睇怕煲呔曾至叻。語云：「沒心沒肺，能活百歲。」既視民望如浮雲，心無牽掛，肺不會氣炸，黑吓面乜毒排晒，想唔長命百歲都難！如果港人平均壽命延長三年，煲呔曾起碼延長三十年。
煲呔曾又話自己「問心無愧」，但港人就唔收貨，指佢施政無方，扶貧不力，任人唯親。不過，佢一於自我感覺良好，民望四十分已心滿意足，懂得睇開放下，活着不累，煲呔曾明年退休，肯定仲有大把世界。
甚麼「繼往開來」——八個字講晒，「始於作偽，終於無恥」，就係咁簡單！