政情：Tim霍貼巴西阿根廷捧盃
南非世界盃舉行得如火如荼，港協暨奧委會會長霍震霆（Tim）上兩個星期去咗南非開會，順便去現場觀看世界盃開幕戰：南非對墨西哥，然後再捧一位南韓朋友場，睇埋南韓對希臘，結果南韓贏二比零，Tim真係無捧錯場！
對於今年邊個國家有機會捧盃，Tim自言佢嘅心水係巴西同阿根廷，事關佢覺得今屆都係南美波嘅天下，佢嘅分析係依家踢波唔單止講體力，腳法亦同樣講究，加上唔少球星喺世界盃前嘅聯賽中踢到傷晒，所以佢認為英格蘭、德國同法國等歐洲列強好可能同冠軍無緣。
今次南非世界盃除咗有波睇之外，仲將佢哋嘅土產樂器vuvuzela推向全世界，Tim話佢都親身試過吹奏vuvuzela，不過佢自嘲可能佢嘅嘴形唔啱，所以唔係好吹到囉！佢仲開心咁話，喺南非仲睇咗嗰度嘅「Big five」，即係獅子、豹、象同埋犀牛，Tim諗來諗去都醒唔起仲有一隻係水牛，相信佢只係開心得滯，一時間諗唔起。