政情：高錕扮聖誕老人搞氣氛
聖誕節就快到啦！「光纖之父」高錕教授同太太黃美芸尋日為「高錕慈善基金」聖誕籌款活動舉行揭幕禮。高太話今個聖誕會留港同家人親戚食飯，共享天倫，高錕到時仲會穿上紅噹噹嘅聖誕老人衫、肚度放上一個枕頭，打扮成聖誕老人搞搞氣氛。
談到高錕最近嘅健康狀況，高太話高錕精神好好，最近不時打網球、乒乓球，行路又行得好快。聖誕將至，高太話個仔仲會由三藩市返港一齊歡度聖誕。
當高太同記者做緊訪問時，高錕突然走過嚟，喺衫袋拎咗隻襪出嚟，用英文話：「This a sock」（這是一隻襪）。據現場有一個男人稱，隻襪係高太朝早畀高錕叫佢着。」莫非高錕唔記得咗着襪，定係預先聖誕老人上身，拎隻「聖誕襪」出嚟搞氣氛？
今次聖誕籌款活動係「高錕慈善基金」九月成立以來首次公開慈善籌款活動，基金製作咗二十棵每棵四十厘米高嘅小型光纖聖誕樹作競投拍賣，每棵底價三千八百八十八蚊。收益撥歸基金，用作協助患有「腦退化症」嘅患病者及病者家屬等。