政情：蘇菲梁公聽會惹圍攻
立法會發展事務委員會上個月搞公聽會傾《巿區重建策略》，點知撞正政府授勳大龍鳳，好多議員遲大到流會收場，雖然會議一粒鐘後齊人重開，但已激嬲一班團體，仲拉隊離場抗議。尋日重搞公聽會，上次唔到嘅發展局局長林鄭月娥坐定定聽團體打油詩、數白欖，即使團體夾定將同一番意見輪流重複講十幾次，主席劉秀成都由得佢哋講，但經濟動力嘅梁劉柔芬（蘇菲梁）抵唔住頸批評話，團體做法似表演，結果被團體代表圍攻。
上次有份遲到搞到流會嘅蘇菲梁，喺會議結束前同劉秀成講，話立法會希望盡量吸納民意，但想巿民嚟到可以安靜表述，而唔係「做埋啲太過好似唔係幾公道嘅表演或者之類」嘅嘢，因為會得不償失，對雙方都唔多好，希望委員會傾吓呢個問題。
此言一出，在場嘅團體代表隨即群起攻之，反問蘇菲梁識唔識尊重言論自由，又諷刺佢今次開會都遲到半個鐘，唔知係咪食埋飯先嚟；仲話如果佢直選，一定叫街坊唔好投佢票。有幾位愈講愈激，愈行愈近，搞到保安即刻築起小型人牆保護佢，場面好無奈。