政情：劉秀成製立會月曆

立法會建築、測量及都市規劃界代表劉秀成，畫則、速寫同攝影都有一手，每年都有親自設計同繪畫座枱月曆送畀新知舊雨，而且年年都有唔同主題，例如去年嘅月曆就用咗考察捷克布拉格時影下嘅相片，今年就速寫香港嘅舊建築物以提倡保育，至於明年月曆就選擇速寫現時嘅立法會大樓。劉秀成話，立法會明年就會搬遷到金鐘添馬艦，所以希望透過月曆同大家分享佢喺大樓嘅點滴回憶。

二○一一年月曆封面以立法會大樓及舊滙豐銀行總行做背景，而每個月份嘅插圖就包含立法會大樓內外多個建築部分，包括每個星期三開大會用嘅會議廳、富有殖民地色彩嘅愛奧尼亞式石柱，以及豎立喺大樓頂部嘅泰美斯女神雕像等。劉秀成又一併收錄埋大樓四周嘅著名建築，包括皇后像廣場、中銀大廈、長江中心等，用作襯托大樓嘅新古典建築風格，並凸顯出大樓嘅位置。

今屆立法會餘下會期唔夠兩年，唔知劉秀成會搵乜嘢主題做二○一二年月曆呢？或者可選擇速寫新立法會大樓，事關新大樓係議員努力所得嘅成果，佢無理由唔捧自己場啩？

Money18新功能「18好路數」為你預測心水股票升跌機會率