政情：黃友嘉為工展會唔放假
由香港中華廠商聯合會主辦嘅「第45屆工展會」尋日開鑼，呢個一年一度逼爆場嘅活動，可以話係廠商會嘅招牌活動之一，身為會長嘅黃友嘉同太太一早嚟到。完咗開幕儀式之後，仲同副會長兼展覽服務主席施榮懷一齊去巡場。
工展會橫跨聖誕同元旦，黃會長成個展期都要嚟睇實，所以今年無得出門去旅行放寒假，難得黃太好體諒，連喺美國讀書嘅兩個囡囡都無投訴，仲會返香港度假陪爸爸，唔怪得黃太話兩個囡囡聽晒爸爸話啦。工展會貨物出名平靚正，黃太話佢都要留意吓有咩好買，仲話黃會長食嘢唔揀擇，平貴食材都合佢口味，所以喺度一定可以揀到心水貨物。
至於施榮懷就係第三次揸大旗搞工展會，愈搞愈熟手嘅佢，今年九百個攤檔，一早就吸引咗四百幾個參展商嚟揀晒位，佢話依家最希望就係天公作美，等大家嚟行都行得舒服啲。嚟緊起碼要嚟多十零廿次嘅佢，同黃會長一樣有個賢內助，遲吓仲會帶埋小朋友嚟湊熱鬧，等施榮懷可以專心睇場。