政情：發叔扶植同輩爭村選!?
鄉議局主席劉皇發盤據屯門龍鼓灘村代表五十年，原本諗住做夠退下火線，點知到提名截止當日一個屈尾十去報名，同三位劉姓原居民爭奪兩個席位，真係耐人尋味。發叔前日就同大家解開呢個疑團，佢話最先報名參選嘅劉東海同劉國明係村內新進嘅八十後年輕人，至於另一個候選人劉威平就係佢老人家帶出嚟選嘅，希望劉威平熟習村務後正式接棒。
發叔大談自己喺龍鼓灘嘅發迹史。佢話同劉威平係同輩，當年劉威平父親係龍鼓灘村村長，曾經扶植佢上位，當佢學咗幾年嘢熟習鄉務後，就正式接棒做村長至今，所以佢想用番同樣方式帶劉威平上位，一齊報名參選，希望劉威平有朝一日可以接棒。不過，劉威平拍住發叔已經自動當選咗兩屆共八年原居民代表，唔知發叔認為要帶幾多年先至可以令劉威平獨當一面呢？
講開又講，鄉議局沙田石門新大樓落成日期有輕微延誤，但局方極力爭取喺明年中鄉議局換屆前入伙，話晒功勞都歸於今屆嘛！不過，新大樓建造費未籌夠，局內已有人諗定下個馬季贊助番個「鄉議局盃賽」，莫非馬會捐錢贊助建鄉議局新大樓，局方想回禮畀馬會？