政情：田二少劉健儀鞭來鞭往

田二少退黨至今只係短短兩星期，但佢同前黨友之間嘅大鬥法卻高潮迭起。先係雙方不斷隔空互罵，其後自由黨雖然表明願為有意參加下屆立法會新界西直選嘅田二少抬轎，以圖息事寧人，但田二少失驚無神又同匯賢智庫葉劉淑儀「撻着」，醞釀一齊組黨，令自由黨人更加不是味兒。

田二少尋日又喺報章發表洋洋數千字嘅文章，題為「善意向自由黨進一言」。雖然話係「善意」，但田二少用字之辣絕對唔嘢小。佢狠批舊黨友喺佢退黨後一周，即違反君子協定向佢發炮，「如同屍骨未寒，便開棺鞭屍」。佢又反駁前黨友方剛斥佢「無黨性」嘅言論，強調佢就大家樂事件表態時，黨仲未有立場，反斥張宇人早前唔跟黨嘅最低工資立場，鬧出「廿蚊張」風波，先係「毫無黨性的始作俑者」。

佢又喺篇文度酸溜溜話，當初退黨前只望帶個職員過檔，協助佢進行直選工作，但遭黨高層諸多阻攔，質疑舊黨友對佢「全面封殺」，迫使佢要「孤家寡人離開」。

面對「再見不是朋友」嘅田二少，Miriam表明感到非常痛心同費解。佢話當初同田二少分手時，雙方都認為大家無存在大分歧，只係處理手法不同，唔明點解田二少家吓要踩到自由黨咁唔掂。針對員工被阻過檔一事，Miriam都予以否認，仲語帶譏諷話唔明田二少有幾「孤身」，事關佢一出去已有葉太呢個新歡，Miriam仲加多句：「我覺得我孤身過佢囉！」佢謔稱唔敢畀篇文章田少田北俊睇，怕佢睇完心臟負荷唔嚟喎。

莎姐：唔會過票畀佢

田少既係田二少大佬，又係自由黨靈魂人物，佢今次受唔受得住都未知，不過佢尋日出席自由黨安撫大會時，原本見到記者都笑盈盈有問必答，點知一聽到「田二少」個名，即刻黑面走人。有份開會嘅前副主席周梁淑怡亦槍口對外，重申萬一田二少真係「改嫁」，即係同葉太組黨，自由黨係絕對唔會過票畀佢喎。