政情：李嘉誠：詆毀創業階級貢獻唔公平

鼓勵企業精神推動慈善公益

籍貫潮州嘅李超人話，清晰記得七十年前首次踏足香港嘅心情，記得當時點樣鼓起勇氣，克服對方言差異嘅恐懼，向人問路。喺佢眼中，香港係個充滿奮鬥故事同機遇嘅地方，但若不經常反躬自省，昔日榮耀未必留得住。所以，佢寄語企業要同時講求創新同着重價值觀，社會亦應自我反問，自己係咪裝備好呢？抑或已成為「臃腫、人云亦云，停滯自滿」嘅人？

李超人作為舉世知名嘅企業家同慈善家，佢點睇呢兩個角色？李超人話，企業精神係經濟發展同社會進步嘅驅動力，慈善公益亦係推動社會嘅關鍵能量，唔一定要從兩極鐘擺嘅角度嚟睇。佢強調，「一啲詆毀創業階級貢獻嘅刻薄扭曲」言論，係唔真確、唔公平嘅睇法，社會應該鼓勵更多企業家或個人推動慈善公益項目。

多年嚟李超人最大嘅啟示係：審慎行事可助你明智地衡量風險，要慎防借大道理之名，背後卻扭曲事實。至於何為成功之路嘅黃金定律，佢就話，積極反思、反躬自省同自我超越嘅人，就可處於更佳位置，選擇自己命運中嘅機遇。