中環出更：查史美倫開行會現「金身」

查太着咗件閃令令嘅中袖褸，襯條色澤深啲嘅吊腳褲，望落好簡潔舒服。卓妮問查太套衫喺邊度買、咩牌子，佢話唔係好記得，應該係有次去歐洲旅行時買嘅。卓妮見佢戴住一對由金、銀閃鑽砌成嘅圓形耳環，同佢一身金色打扮十分合襯，貴氣逼人。

楊敏德續撐愛女設計

行會另一位品味超凡嘅女士楊敏德，呢排瞓身支持香港設計，尋日繼續着住愛女潘楚穎設計嘅時裝。卓妮唔止一次發現佢着囡囡出品嘅衫裙，楊敏德見卓妮咁欣賞，尋日好有心咁送咗本書《時裝有品》畀卓妮。本書巨細無遺介紹時裝界專門知識，包括原料分類、製作及銷售，啱晒有心入行嘅人睇。卓妮就對書中十一位時裝新世代嘅專訪最有興趣，唔知幾時潘楚穎可以現身說法同大家分享心得呢？