政情：房委會開fb攞嚟衰
依家係人都玩facebook（fb），連房屋委員會都追上潮流，開咗個「公屋人情風貌」專頁，畀公眾人士分享佢哋對香港公屋嘅美好回憶，仲率先將石硤尾邨、蘇屋邨同牛頭角下邨呢三個歷史悠久嘅屋邨圖片同紀錄短片貼咗上去。點知真係唔衰攞嚟衰，即刻畀網民勁寸，話既然講到咁美好，點解要拆晒啲舊邨？事關石硤尾邨同牛下邨已經拆晒，蘇屋邨嚟緊會拆。房委會呢鋪真係捉蟲。
有網民喺專頁留言：「我認為這些屋邨風貌獨特，不應清拆。」又有人話：「我經常路經牛下，很回憶以往日子，希望牛下可盡快回復光彩。」仲有人話：「香港人只會懷念已失去的東西，舊有郵政總局、香港會，新有皇后及天星碼頭，以致牛下。到底要拆到何時？」更有網民借題發揮，話要起番居屋：「要求復建居屋」、「希望政府能同時增建公屋及居屋，令更多低下及夾心階層市民受惠」。睇嚟今次房委會真係自己攞嚟衰。