政情：KK甩轆惹轉軚疑雲

KK就致謝動議提出修訂，遺憾施政報告解決貧富懸殊無方，兼且漠視民意拒絕復建居屋。不過佢掛住講自己意見，唔記得跟規矩要求動議自己嘅修訂，要立法會主席為佢代勞。之後表決佢個修訂時，KK又失晒魂，無舉手話要記名表決，或者佢覺得唔需要立法會留低白紙黑字紀錄啦，好在主席刻意放慢步伐，畀機會KK醒覺，否則大家都唔會知道邊個議員投咩票。

最後表決致謝議案時，就喺主席臨宣布結果嗰一刻，KK忽然舉手話自己投錯票，希望主席畀佢改番。此話一出，引來哄堂大笑。佢事後解釋，話以為跟衞生服務界代表李國麟投票就無死，偏偏李國麟支持致謝議案，所以咪搞錯咗囉，幸好身邊嘅社會福利界代表張國柱提佢，否則今次就係佢從政以來第一次投錯票喎。真係信不信由你！