政情：哪吒闖電視城搵陳豪「簽名」
將軍澳堆填區一波未平，一波又起。政府早前打算「侵佔」郊野公園用地，將清水灣公園改為堆田區，最終畀立法會否決。不過件事仲有下文。原來喺政府規劃中，仲有十五點六公頃位於將軍澳嘅地，會被用作堆積區，呢幅地喺正無綫電視城旁邊，雖然唔使通過立法會，但要得城規會批准。
反對擴建堆填區
一直就擴建將軍澳堆填區一事同政府打對台嘅自由黨區議員方國珊（哪吒），尋日得到無綫批准，可以喺電視城範圍蒐集員工簽名，反對呢項計劃。哪吒話，無綫員工嘅反應不知幾熱烈，十個有九點九個都支持，連「視帝」陳豪以至王祖藍、李思捷、阮兆祥、郭羨妮等藝人，都為佢打氣同簽名支持。
哪吒仲話，除咗一班藝員之外，電視廣播集團總經理李寶安、製作部總監曾勵珍同監製李添勝等都有簽名反對，佢仲有機會參觀李寶安嘅辦公室，發現呢位高層辦公嘅地方，原來擁有「無敵堆填區景」，仲唔喺政府規劃中嘅十幾公頃地之內。哪吒遲啲會將啲簽名交去城規會，話希望可以成功阻止呢項工程喎。