政情：自由黨地盤被蠶食
旅遊發展局一向係自由黨守穩立法會功能界別議席嘅橋頭堡，對拉攏旅遊界、零售及批發界、飲食界同航運交通界嘅業界人士都具戰略功能。不過，尋日旅發局部分委員換人後，自由黨呢個地盤似有漸被蠶食之虞。
胡兆英入旅發局
政府尋日宣布，委任旅遊業議會主席胡兆英、貿易發展局副總裁周啟良同旅行社行政總監袁麗鳳出任旅發局新成員。眾所周知，胡兆英係經濟動力力捧之人，加上機場管理局行政總裁許漢忠，令經濟動力喺旅發局內佔咗兩個位，勢力日漸膨脹。反之，自由黨黨員何栢霆與貿發局總裁林天福同香港中旅社董事長盧瑞安，因服務滿六年「退役」卸任，自由黨喺局內只剩下擔任主席嘅田北俊一人。
何栢霆之前亦係以旅議會主席身份入旅發局，依家「何出胡入」本屬合理調動，但客觀效果就係導致自由黨同經濟動力，喺旅發局內嘅勢力出現此消彼長格局。睇嚟自由黨要收復立法會旅遊界議席失地，未來兩年要再加多幾鞭追趕至得嘞。