政情：陳啟宗勁柴政府台

Ronnie尋日中午喺恒隆地產業績會上，被問及會唔會捐錢畀「關愛基金」，大家諗住循例問句，等佢表態回應。點知Ronnie特立獨行，直言唔會響應基金，令在場記者無不愕然。Ronnie解釋，基金用意雖好，但方向必須正確，捐錢畀基金，善款最終都唔知去咗邊，佢要捐就自己捐，「想捐去邊都得」；佢又話基金唔應該由政府嚟做，矛頭似乎直指被委任做基金主席嘅政務司司長唐唐。

范太寸CY小器？

現時唐唐同行會召集人梁振英（CY）都被視為疑似特首候選人，競爭態勢已成。Ronnie同CY同屬一國兩制研究中心核心，感情深厚，繼日前CY好友會計界議員陳茂波批評基金主席唔應該由唐唐嚟做之後，Ronnie尋日又潑基金冷水，佢哋嘅言論，自然引起「挺唐」中人嘅注意啦。被視為唐唐「家臣」嘅廠商會立法會代表林大輝，尋日即刻「護駕」，指基金運作細節未有，批評嘅人毋須咁早出聲，針鋒相對嘅味道好濃。

曾公開指CY唔適合做特首嘅范太尋日出席青協一個青年網上節目時，表明唐唐做基金主席無問題，又話捐錢理念人人不同，Ronnie唔捐畀關愛基金無問題。不過佢話鋒一轉，順勢踩一踩過去就最低工資同居屋等問題跟政府唱反調嘅CY，暗指唐唐身處政府要職，有機會表現，但亦有機會出錯，佢話「有啲人喺旁邊講，但又無乜參與，到底邊樣好（着數），真係好難講」。范太仲不以為然話，如果圍繞邊個應唔應該做基金主席呢類小問題爭拗，「真係小器咗啲嘞」，大家應該健康競爭，各展所長，畀市民作出選擇咁話。

范太仲喺網上節目同年輕人分享，話自己有時說話太直，傷害咗人都唔知。事後記者問范太，傷害過嘅人包唔包括CY？范太諗都唔諗就話：「Sorry！無包括CY，事關政治人物唔應該怕受人批評；如果怕即係唔適應政壇呢個『熱廚房』，唔該自行離開！」睇嚟二○一二年嘅特首選舉戰，好戲還在後頭。