中環出更：肥亨嘆樓市炒到似九七
香港樓市係咁升，好多負資產都將近返到家鄉，甚至有錢賺，施政報告穩定樓市措施軟弱無力，好多業主都坐地起價，基層及中產人士置業難上加難。前日傍晚，卓妮六點鐘喺中環ifc商場遇到中策集團主席馬時亨，見佢同幾個銀行家朋友傾偈，大約五分鐘後離開，之後一路行一路講電話，非常繁忙。
卓妮上前同肥亨打招呼，先知道佢最近都貢去新界一個新樓盤睇樓湊熱鬧，感受吓樓市嘅癲況，佢話唔睇猶自可，一睇就嚇親，事關樓價貴到離晒譜，連佢都買唔起喎！其實肥亨食米又點會唔知價吖，更談不上「買唔起」三個字，只係佢見個單位建築面積二千幾呎，但實用面積只得千幾呎，名副其實係「發水樓」，十足海參浸水發大，最弊係一間賣成二千幾萬元，物非所值。
籲小心樓股泡沫
肥亨話，揸住四百萬美元，喺外國任何一個城市，都可以買到又大又優質嘅靚樓，所以佢睇完之後都要打退堂鼓。
肥亨警告話，豪宅炒到咁貴，有啲似九七年樓市高峰嘅氣氛，樓市泡沫正在形成，遲早出事，究竟冧唔冧市同幾時冧市，利息走勢影響好大，但呢方面佢就無水晶球喇，只能呼籲大家小心啲，量力而為；無咁大個頭，就唔好戴咁大頂帽。至於股市方面，肥亨就話恒指距離最高峰三萬幾點仲好遠，但炒風熾熱，泡沫正在形成，大家都要做好風險管理，小心為上！