政情：三港人增補為全國政協委員
全國政協常委會尋日起一連三日喺北京開會，今次會議其中一項議題，就係通過增補政協委員名單。據聞名單上有二十三名候選人，港區佔三人，包括立法會議員黃宜弘太太梁鳳儀、九龍社團聯會理事長兼九龍城委任區議員王惠貞（Connie）、以及廣東社團總會副會長兼沙田區議員簡松年，名單將於本周五正式通過。
人稱「才女」嘅梁鳳儀唔使多介紹，為「勤＋緣」媒體服務有限公司創辦人兼行政總裁。至於Connie就係廣西壯族自治區政協常委，曾獲政府委任為公民教育委員會成員，其後更被獲委任為九龍城區議員。簡松年則為執業律師，二○○五年與全國政協委員王國強等一班專業人士創辦香港專業人士協會，現為協會主席，做咗廣東省政協委員達十四年。
至於內地嘅增補委員，亦都係政商界及宗教界名人，包括前國務院總理朱鎔基女兒朱燕來、貴州省省長林樹森、中國佛教協會會長傳印長老、銀泰百貨集團董事長沈國軍等。
