政情：王國興晒假腳撐傷殘
尋日立法會第九次辯論正視殘疾人士交通需要嘅議案，雖然每次都獲得通過，但政府一樣唔做嘢。議員為咗令政府聽教聽話而出盡法寶，工聯會立法會議員王國興尋日索性撐起拐杖扮做殘疾人士，仲掛埋隻假腳喺身，大唱萬惡淫為首，真係要寫個服字畀佢！
尋日王國興一發言就企出議事堂條走廊，大唱「福心啦，好心啦，可憐吓我哋啲傷健嘅市民啦……」可能立法會講咗九年政府都唔聽，所以王國興愈講愈激動，甚至一邊講一邊揮舞佢支拐杖。其實王國興嘅上身表演已經唔係第一次，講長者牙科福利就出動假牙，上星期三宣讀施政報告時又放籃生果象徵生果金，但原來籃生果係臭㗎，真係難為坐喺佢前面嘅議員囉。
另外，尋日嘅辯論破天荒地有手語翻譯員企喺議事廳內，為坐喺公眾席嘅聽障人士翻譯，據提出呢次議案要用手語翻譯嘅立法會街工議員梁耀忠講，因為手語都係語言，而公眾席唔可以講嘢，所以翻譯員被安排企喺議事廳。