政情：王國興晒假腳撐傷殘

尋日王國興一發言就企出議事堂條走廊，大唱「福心啦，好心啦，可憐吓我哋啲傷健嘅市民啦……」可能立法會講咗九年政府都唔聽，所以王國興愈講愈激動，甚至一邊講一邊揮舞佢支拐杖。其實王國興嘅上身表演已經唔係第一次，講長者牙科福利就出動假牙，上星期三宣讀施政報告時又放籃生果象徵生果金，但原來籃生果係臭㗎，真係難為坐喺佢前面嘅議員囉。

另外，尋日嘅辯論破天荒地有手語翻譯員企喺議事廳內，為坐喺公眾席嘅聽障人士翻譯，據提出呢次議案要用手語翻譯嘅立法會街工議員梁耀忠講，因為手語都係語言，而公眾席唔可以講嘢，所以翻譯員被安排企喺議事廳。