政情：邱騰華兩毒招護法
環境局早前向立法會提出《二○一○郊野公園（指定）（綜合）（修訂）令》，建議將五公頃郊野公園用地用作擴建將軍澳堆填區，點知法令兵敗如山倒，六大黨派更罕有地團結一致要求廢法。港府尋日使出毒招，死撐立法會無權廢法，但原來早於尋日之前，環境局局長邱騰華已經屢出毒招，一手向政黨大施離間計，一手恐嚇班垃圾車司機，強行為政策上馬。
自由黨方國珊（哪吒）現時係西貢區嘅委任議員，佢一早就圈定咗喺堆填區附近嘅住宅區下工夫，諗住喺呢區選區議員，所以哪吒好早就留意住堆填區嘅問題。政府就係睇準呢一點，聽講環境局先後聯絡咗唔同黨派嘅議員，話佢哋如果聯手要求廢法，等同變相支持方國珊，「唔係嘛，你哋跟住方國珊行，咪即係塞選票入佢個袋？」言下之意係期望各黨各派唔好唔覺意抬舉咗哪吒，期望一股團結嘅力量就咁瓦解。不過堆填區事件咁sexy，其他黨派又點會咁易放手？
政府嘅第二招毒招，就係恫嚇垃圾車司機，企圖嚇到佢哋唔敢反對喺將軍澳起堆填區，原來環境局早前主動約見過一批垃圾車職業司機，同佢哋講若果立法會否決擴建將軍澳堆填區，佢哋嘅生計必受影響，嚇到班司機鼻窿都冇肉，認為「兩個大人打交，都唔好搵着啲小朋友嚟搞」。司機無辜做咗夾心人，於是搵佢哋嘅功能界別立法會代表劉健儀吐苦水。
劉健儀做夾心人 潘潔踢爆謊言
今次做咗夾心人嘅，除咗垃圾車司機，仲有身兼自由黨主席劉健儀（Miriam），佢手背當然要支持司機，令佢哋嘅生計唔受影響，但係佢手掌又要支持黨友哪吒，力拒將軍澳嘅堆填區擴建。前日Miriam、哪吒同司機開會，司機爆出畀官員嚇到食唔安坐唔樂，驚堆填區遭否決之後佢哋冇啖好食，於是遷怒哪吒，仲話諗過去包圍哪吒，要佢打消反對堆填區擴建嘅念頭。哪吒聽到之後嚇咗一跳，唔明政府為咗一個一意孤行嘅政策，竟然要擺佢上枱去恐嚇班司機。
其實司機冇啖好食嘅謊言，好快就由環境局副局長潘潔不攻自破，佢前日同議員講，如果將軍澳堆填區滿咗，就要將垃圾運去屯門或其他更偏遠嘅地方，屆時垃圾車喺路上行走嘅次數將會更頻繁。喺咁嘅情況下，司機嘅生意就算唔會多咗，都一定唔會少，點會好似政府同佢哋咁講係影響生計呢？好明顯係向司機亂咁噏喇。總之今次政府無所不用其極，大家又可以放長雙眼，睇吓件事點收科囉。