中環耳目：賭王超蕸頂級至愛芝士餅
賭王何鴻燊近排轉趨活躍，不時與家人出動歎茶，見到甜品，更係愛不釋手。囡囡何超蕸尋日以東華總理身份，參觀東華新開張嘅社企麵包店，大爆爸爸同佢一樣，視芝士餅為頂級「飛佛」。
東華致力協助殘疾人士融入社區，尋日喺堅尼地城域多利道一號開設「iBakery愛烘焙麵包工房」，東華主席梁定宇、前主席李三元及多位總理齊到賀，品嘗吓熱辣辣嘅麵包。店內亦有新鮮出爐曲奇，超蕸顯得十分雀躍，大爆賭王勁鍾意食甜品，唔知超蕸會唔會打包兩件餅返屋企氹爸爸開心？
梁主席都打雀咁眼望住啲朱古力曲奇，原來佢係朱古力迷，屋企更有一個朱古力團隊，事關太太同五歲囝囝都係無朱古力不歡，但平時食麵包，梁主席就揀麥包，貪佢健康啲。
有份嚟主禮嘅勞工及福利局局長張建宗都話係曲奇迷，乜味啱佢？局長就好貪心咁話：「乜味都鍾意！」