政情：范太自爆中學年代開始左傾

商人父親唔喜歡共產黨

范太喺節目中話，爸爸徐大統喺上海代理紙業，自小衣食本無憂，但佢四歲嗰陣、即中國解放嗰年，爸爸先急急決定舉家移居香港。范太直言，由於佢嘅商人爸爸唔喜歡共產黨，佢自小對國家印象唔多，更唔使講對自己國民身份嘅認同。

范太開始認識國家，原來始於初中。佢憶述當年喺聖士提反女子中學遇到幾位好好嘅中文同歷史老師，畀佢了解到中國點樣被列強侵略，令佢頓悟中國人一定要做好自己，先唔會畀人睇低。佢仲透露中學時期喜歡到書局打書釘，睇咗《牛虻》、《太陽照在桑干河上》等書籍，自此傾向共產主義，「覺得共產黨好偉大」。

「六四事件 中國人嘅悲劇」

不過，范太覺得香港現時嘅國民教育唔足夠，仲認為香港教科書應該清楚陳述六四事件，讓學生了解國家歷史：「六四事件不得不提……呢件事係中國人嘅悲劇，政府用了很不幸嘅方法，來控制個場面。」

范太又喺節目上分享一件兒時點滴，話小學時家住半山，有次去超市買雪條，點知排隊時服務員竟要佢讓開，先服務排喺佢後面嘅外國人，件事令第一次明白到中國人要自強，當時仲即刻放低支雪條，無再幫襯嗰間超市。