中環出更：HUGO's開餐大舊石葉澍堃憶當年情
於一九六九年開業嘅HUGO's（希戈餐廳）闊別四年後，最近跟隨重開嘅凱悅酒店強勢回歸。以前經常幫襯HUGO's嘅立法會議員石禮謙，前日就同女友Lisa約埋好友葉律師及「新食神」葉澍堃（Stephen）夫婦，再去HUGO's回味一番，眾人睇到往日嘅木製大門、希戈鐵甲和槍劍、燈飾及舊木地板，猶如故人重逢，大舊石閉起眼睛，重拾昔日情懷。
頭盤餐車夠傳統
HUGO's新店沿用法國Christofle頂級銀器餐具及六十年代傳統頭盤餐車（the hors d'oeuvres Trolley），頭盤餐車盛載十八款沙律前菜，包括沙甸魚、煙三文魚、牛脷等，任君選擇。大舊石同Stephen揀選三道菜做午餐，除頭盤沙律外，餐湯係蝦味香濃嘅龍蝦湯，主菜分別有澳洲安格斯牛肋骨肉、加州鱸魚配辣肉腸及白豆檸檬油，甜品係經典嘅焗朱古力梳乎厘。
美酒配佳餚，大舊石即場開兩支葡萄酒，大家摸住酒杯底，不期然勾起絲絲回憶。大舊石記得HUGO's開張嗰年，佢從澳洲畢業返港，加入太古船務，經常要同外國買手傾生意，朝早喺半島酒店及喜來登酒店車輪轉食早餐見客，晚餐就去HUGO's，因為當年環境好嘅西餐廳唔多，食完晚飯再去跳舞。
Stephen就話拍拖時好少幫襯HUGO's，反而結婚後多咗，最鍾意餐廳嘅暗淡浪漫情調。
卓妮