政情：4L與專業會議拍散拖

消息話，經濟動力同專業會議各自每個星期都開會，大約一個多月前，兩者開始行埋，定期約喺中國會碰頭，就議會內嘅重要議題交流意見，呢個做法行吓行吓，變成好似少男少女玩初戀，個心十五十六，唔見唔舒服，依家已經形成機制，定為每兩個星期見一次，以進一步增進了解，培養感情。

均同自由黨有過節

呢兩個港府最穩定嘅護航力量另一個「拍拖」迹象，係攜手合力撐港府嘅政改方案。以經濟動力牽頭嘅「工商界政改動力」，最近失驚無神改名為「工商界專業政改動力」，原來真正底蘊就係為方便專業會議加盟，以後兩者光明正大以「拍拖更」出遊，唔使閃閃縮縮。為咗畀個名分專業會議，「工商界專業政改動力」仲度緊改架構，由只有林健鋒一位召集人，變為兩頭馬車領軍，何鍾泰擔任另一位領軍人物，負責統籌聯繫專業界別參與者。經濟動力連名分都畀埋專業會議，仲唔係想有意發展更深層次關係？

眾所周知，經濟動力同專業會議都係港府嘅最好朋友，理念方面大家肯定夾得嚟，而且，佢哋有個共通點，就係都同自由黨有過節。「3L」由自由黨分裂出來，專業會議嘅梁美芬○八年參選九龍西，則同自由黨田北辰形成對立搶票嘅競爭格局，所以，佢哋都唔會埋自由黨堆，「五散人」又散修修，「詹Sir二人組」詹培忠同謝偉俊更加出名同政府作對，喺咁嘅大環境下，經濟動力同專業會議行埋，雖屬意料之外，但亦係情理之中。