中環出更：蔡國雄啤牌腕錶獨一無二
香港橋牌協會名譽會長、中國金融租賃集團主席蔡國雄打咗四十五年橋牌，對於呢樣智力運動十分着迷。
國產錶芯 瑞士調校
早前蔡老闆又慷慨贊助名人橋牌邀請賽，佢戴住一隻錶面好似啤牌圖案嘅陀飛輪靚錶滿場飛，造型十分搶眼。原來隻錶係佢自己設計，再搵瑞士錶廠St. Gallen度身訂造，全球獨一無二㗎！蔡老闆話，隻錶嘅錶芯來自國產名牌錶廠天津海鷗，由於國產陀飛輪仲未達到瑞士頂尖品牌嘅水準，所以特登送到瑞士錶廠將時間嘅準確性調校到世界級。至於用貝母造成嘅錶面係隻錶嘅靈魂，事關圖案似足啤牌，襯晒蔡老闆愛橋牌嘅嗜好。
蔡老闆提起隻錶就愈講愈投入，佢介紹錶面中間偏左位置有個細小白點，當隻錶需要上鏈時，白點會變成紅點，提醒佢嘅主人上鏈啦！內外兼備嘅靚錶叫價幾多？蔡老闆好鬼馬咁笑稱：「只要五萬蚊，平到你唔信！」梗係啦！負責幫佢製造嘅瑞士錶廠St. Gallen嘅老細係佢老友龍家祥嘛！當日都在場嘅龍生笑謂，蔡老闆係愛錶之人，梗要支持佢。