政情：林鄭死撐唔認放生發展商

施政報告提出限制發水樓，但要等到明年四月至實施；即係話由依家到明年四月呢段時間，發展商可以加快入則，毋須受限制，難怪政府畀市民批評擺明放生或傾斜發展商。不過，發展局局長林鄭月娥尋日仲喺電台上死撐，話完全不能夠接受呢個講法，亦不同意；仲理由多多，話重新草擬《作業備考》限制發水樓，並非簡單工作，而是相當大改動，言下之意需時去做，不過佢又承認發展商趕搭尾班車無可厚非喎。咁仲唔係放生！