八達通行政總裁陳碧鏵與被指強迫遊客購物嘅導遊李巧珍，尋日不約而同出嚟向公眾道歉，但論誠意及手腕就高下立見。陳碧鏵雖然就出售客戶資料道歉，話願意為事件負責，但卻繼續狡辯，為回應出售客戶資料前後版本不一辯護，話大家對「出售」嘅理解唔同。阿珍嘅道歉誠懇得多，不但和盤托出，又話事發後好希望向每位團友道歉，想大家畀條生路佢繼續做導遊。連前高官王永平都鬧爆陳碧鏵一派胡言，叫佢返去讀過書，由小學讀起，搞清楚咩叫買、咩叫賣。