政情：楊受成捐355萬關愛湖北老人
英皇集團○七年開先河，同無國界社工喺湖北推行善終服務「英皇慈寧服務計劃」，三年以來無數當地臨終孤寡老人受惠。英皇集團主席楊受成博士尋日再以「楊受成慈善基金」名義向慈寧計劃捐贈三百五十五萬港元，並聯同「無國界社工」會長陳萬聯應及中聯辦社會工作部部長張鐵夫主持新標誌揭幕儀式，象徵計劃進入新階段。
推行善終服務
楊受成話自己做善事不求回報，最想做嘅就係善終服務，事關可以幫一啲無依無靠、被社會遺忘嘅老人家，有尊嚴咁走完人生最後階段。
截至今年三月，連同開設「湖北慈善香港英皇關愛老人護養中心」嘅經費及醫療服務上嘅津貼，英皇集團喺呢個計劃上捐款近一千二百萬元；落實新一輪捐款後，捐款總額近一千六百萬元；而受惠老人約五千人，社區受惠人士更近一萬人次。