政情：鄭家富借勢退黨？

前晚民主黨開特別黨員大會前，鄭家富已經事先張揚話，自己一係就跟隨黨決定支持通過政改，一係就退黨反對，結果黨員大比數支持，佢就連會後記者會都唔蒲頭。到尋日佢繼續跳草裙舞，表明一定會投反對票，問題只係退唔退黨，然後擺出一副好委屈嘅樣話，當佢個人原則同黨友情誼不能共存，「忠義兩難全」嘅時候，快樂地分開未必唔係好事。

唔參選專注證婚

雖然鄭家富講得好冠冕堂皇，實情背後又傳出另一個故事。話說民主黨內報名參加明年區議會選舉嘅程序早已完結，但係多年來屬雙料議員嘅鄭家富竟然無報名。此外素來對黨務不甚積極嘅佢，雖被歸類為民主黨少壯派精神領袖，但近年新界東支部嘅事佢都好少沾手，以現時民主黨喺新界東已經另有兩條隊伍，連同改革派嘅范國威，鄭家富參選的話可謂三面受敵，難怪早喺兩個月前，已有傳聞下屆佢會退選，變相為佢退黨埋下伏線。

不過更加重要嘅係，本身係律師嘅鄭家富五年前已經喺立法會一個會議上，申報自己有婚姻監禮人嘅資格，自從佢開埋公司接生意後，佢連立法會嘅嘢都理少咗，好似高鐵撥款一役中，已經有黨友戲言鄭家富焗留立法會應該損失唔少。綜合以上種種迹象，有黨友就質疑鄭家富呢次好可能只係借勢退黨，令自己有一個圓滿嘅下台階，目的好可能就係疊埋心水收山搵真銀。根據網上一則廣告，鄭家富主持一次婚姻監禮，收費四千幾蚊，睇嚟真係好搵過做議員好多喎！