中環出更：顏福偉環保着短褲返工
有「白花油王子」之稱嘅和興執行董事顏福偉（Stephen），一向創意無限，敢作敢為，連衣着都好有個人風格。前日卓妮喺和興嘅股東會見到佢，佢着咗件日本型男品牌ABAHOUSE藍色恤衫，配條Edwin牛仔褲，形象同佢身旁一眾西裝筆挺嘅上市公司高層好唔同。Stephen笑謂，呢身打扮已經算係正裝㗎啦！
追捧東瀛品牌
原來佢平時仲誇張，着短褲返公司。大家咪以為佢不修邊幅，其實係為支持環保。Stephen話，佢一向將公司冷氣溫度調校至攝氏二十五度，但室內溫度的確有啲高，所以再加把風扇就啱啱好，咁樣嘅環境着短褲最舒服啦！佢都鼓勵同事咁樣着，但同事唔肯。計卓妮話，同事唔敢就真！
咪睇Stephen好似對衣着冇咩要求，查實件恤衫係日本著名原創品牌ABAHOUSE，深受中港台崇尚無拘無束、思想多元化嘅型男追捧。雖然香港都有得賣，但Stephen話佢會去日本買，佢當日着緊嗰條Edwin牛仔褲，都係購自日本。