政情：陳灶良愛圍村豬肉

身兼林村旅遊發展召集人嘅良哥話，鄉公所每次做禡要預備廿幾人餸菜，全靠船灣李屋村村長李鳳有一手包辦。有哥入廚幾十年，好後生已經喺圍村學煮盆菜，最拿手係客家炆豬肉，佢話一次做禡要用上廿幾斤豬腩上肉，加上豬手、豆腐卜、粉腸、竹筍、鹹蝦等材料，用鑊以慢火炆一個多小時，最後加上蠔油、麻油、豉油王、老抽調味，色香味俱全。

有哥話，喺圍村內炆豬肉一般會用柴火，火力較平均，反而用石油氣爐難度較高，經常要留意火力，否則咁大煲豬肉好易煲燶。不過，炆廿幾斤豬肉對有哥來說只係濕濕碎，因為有哥試過喺圍村大節日一次過炆幾百斤豬肉，認真厲害。當日良哥同大埔鄉事委員會主席文春輝等鄉紳食得津津有味，可惜鄉公所做禡唔會對外開放，大家想食客家炆豬肉，就要等圍村喜慶節日嘞！