政情：張仁良盼教師學識編程
生活於數碼年代，科技已成為日常不可或缺嘅一部分。除咗好多新一代學寫程式外，為人師表都要與時並進。香港教育大學校長及公共政策講座教授張仁良，日前出席「賽馬會運輸思維教育」啟動禮時就話，期望可以培育到新一批老師每個都對編程及運算思維有所了解。
培養解難能力及創造力
張仁良話以前讀過統計學，對運算思維都有啲了解，雖然就未試過真正寫一隻遊戲，但過往就不時有機會運用到同編程相關嘅知識去整理數據。講起今次計劃除咗教學生編程外，仲可以培養學生解難能力及創造力，佢就認為教學方面嘅未來大趨勢，都離不開進一步數碼化同運用更多唔同嘅App教學，因此嚟緊新一代老師就算唔識創作一個完整嘅App，都至少要睇得明一個App背後嘅編碼咁話，而已經教緊書嘅老師佢亦鼓勵可以了解吓。
城大電子工程學系副教授張澤松就認為，編碼或將會成為下一代嘅其中一種普及語言，好似中文英文咁，大家唔識寫都會睇得明喎。