政情：白富鴻接棒掌菁英會
香港菁英會與百仁基金雙雙今年換屆，菁英會早幾日選出第三屆執委會，現任主席施榮忻（Jaime）六月底任期屆滿後，將會正式交棒予「燕之家」老闆白富鴻，而常務副主席則由資訊科技界洪為民擔任。至於其他副主席就有立法會議員霍震霆長子霍啟剛、福建幫頭領盧文端兒子盧金榮、莊氏集團執行董事莊家彬、全國政協常委楊孫西兒子楊華勇等。
白富鴻接掌菁英會後，佢話會全力辦好年底舉行嘅第二屆香港博鰲青年論壇，仲計劃每個月搞一次研討會，讓大學年輕一代多啲交流。Jaime就話，菁英會未來將會發展得更具規模及更高效，又話會請來中港兩地商界猛人，分享從商經驗及對青年發展嘅睇法，好似阿里巴巴集團創辦人馬雲、前體操王子李寧、前恒生銀行大班柯清輝等，都會係佢哋邀請之列。
Jaime卸任在即，佢話最自豪係成功同博鰲論壇合作喺香港舉辦首屆青年論壇，期望第二屆論壇同樣搞得有聲有色。Jaime七月起會接替恒基地產副主席李家傑，擔任百仁基金主席。