希臘財困，歐洲金融風暴一觸即發，美國股市尋日凌晨經歷恐怖十分鐘，道瓊斯指數一度暴跌過千點，搞到尋日港股都風雨飄搖，不過，尋日卻只見港交所主席夏佳理朝早出嚟澄清本港系統與美國唔同，叫大家唔使擔心，港府財金官員就全日唔見影，咁大件事都冇人出嚟安定人心，政圈中人都話奇怪。追查後先知，尋日財政司司長鬍鬚曾同財經事務及庫務局局長陳家強一個放假、一個公幹，冇人睇檔，又點會有人回應呢？
政府憲報尋日公布，鬍鬚曾一早攞咗假，本月５日、７日及８日都放假，但冇講佢會去邊。至於陳家強就因為公務離開咗香港，尋日下晝至會返嚟，所以財政司司長工作就暫時交由商務及經濟發展局局長劉吳惠蘭署理。兩大財經官員出缺，撞啱全球股市天翻地覆，特區政府惟有扮透明。
翻查政府公告，鬍鬚曾似乎一早攞咗假，但５日到８日嘅假期中間，偏偏周四（６日）又返咗工，呢一日正係孖曾兄弟煲呔曾兩度改期、落立法會出席答問大會嘅日子，唔怪得鬍鬚曾喺假期中途都要返一日工，果然係沙煲兄弟！