魔獸爆鼻照殺鷹

杜蘭特首度入選最佳陣容

首回合大敗43分嘅鷹隊，不斷向杜域侯活採取犯規戰術，其中第三節早段後，荷福特更撞爆侯活個鼻，令「魔獸」血濺球場，幸好侯活經診斷後可以繼續比賽，只係要搵棉花塞住鼻孔，場面頗為搞笑。魔術最終亦贏112比98，今季季後賽6連勝。

另方面，NBA公布今季常規賽最佳陣容，今次由122位記者及評論員作出投票，結果杜域侯活及勒邦占士均獲得全數第一選票，以滿分610分入選最佳陣容，高比拜仁就獲得119張第一選票，以604分入選，而「得分王」杜蘭特就以579分首度入圍最佳陣容！最後一個席位落喺韋迪身上，佢以520分入選。拿殊、迪倫威廉士、魯域斯基、安東尼及史杜迪米亞則入選第二陣容。