政情：象哥撐IQ博士接任主席
立法會主席可能為咗投票讓2012年政改方案通過而辭職，最新消息話，一旦成真，中總代表黃宜弘好大機會係接棒做立法會主席嘅黑馬人選，貪佢無競逐連任嘅包袱，以後做咗主席照樣可以投票，民主派亦奈佢唔何。對IQ博士有機會做主席，我哋尋日問過民建聯主席譚耀宗、民主黨主席何俊仁同會計界陳茂波，佢哋可能各有不同嘅政治包袱，一律封口唔評論，反而表明下屆想卸任嘅進出口界代表黃定光，肯表態撐IQ博士做主席。無政治包袱，真係唔同啲嘅！
象哥話，撐黃宜弘只係以事論事，唔代表覺得立法會主席一定會辭職。佢話，每個議員都有資格選立法會主席，IQ博士當然亦係可以考慮嘅人選啦。至於IQ博士曾鬧過「中指風波」，象哥話，呢個更加唔係問題：「當時佢係被人挑釁先至發生啫，而且比起依家好多人喺議事堂講諧音粗口『不該』，爭得遠啦！」大象哥咁撐IQ博士，IQ博士第日如果真係做咗立法會主席，真係要多謝大象哥一聲至得囉！