政情：4L搞論壇4P玩失蹤
由「4L」經濟動力牽頭嘅工商專業政改動力尋日開騷，第二次舉辦政改論壇，為政改搭建一次由工商界、普選聯同特區政府官員唇槍舌劍嘅「三方會談」，商界同專業界有二百幾人參加，場面相當墟冚，反而，早前曾傳出同4L有摩擦嘅專業會議4P，尋日一個都無露面，唔通呢兩個一度傳出拍拖緋聞嘅建制派新興勢力，真係因了解而鬧翻？
前幾日工聯會會長鄭耀棠嗰檔政制向前走大聯盟又係搞政改論壇，但係尋日工商專業政改動力個騷，相對多「生面口」嘅人，事關罕有踏足親中團體活動嘅一班民主派人士好似民主黨主席何俊仁、教協主席馮偉華咁，都有出席做講者，令論壇擦出唔少火花，相對其他聲音一面倒嘅論壇，4L尋日場騷算有睇頭！
有心水清嘅人發現，本身加入咗工商專業政改動力嘅4P尋日全程無現身，令人聯想到早前林健鋒選立法會政改小組會副主席時，4P之中嘅何鍾泰同劉秀成，被懷疑連同葉劉淑儀一齊「倒戈」，投咗票畀民主黨劉慧卿一事，連番事件，睇嚟4P醞釀退出政改動力嘅傳聞，空穴來風，未必無因。