青海玉樹大地震災情嚴重，向來為善最樂嘅全國政協常委何鴻燊博士尋日捐出五百萬元賑災，捐款由澳門中聯辦代為轉交青海玉樹縣，以表達對當地災民嘅支持，燊哥尋日仲向玉樹縣災區嘅同胞致以最深切慰問，並衷心祝願受災同胞早日重建家園。
燊哥話，睇到救援人員爭分奪秒搶救地震生還者，同埋災區人民永不言棄嘅精神，實在令人動容！
燊哥仲話，港澳同胞與內地人民同根共生，大家面對天災都深感痛心，他相信，只要集結力量和關懷，發揚「一方有難，八方支援」嘅守望相助精神，必能協助災民渡過難關，所以燊哥捐出五百萬元賑災之餘，亦呼籲社會各界人士積極參與籌款賑災，為災民提供適時援助。
燊哥真係慈悲為懷，善心滿瀉！