政情：陳茂波囝囝返英似歷險

冰島火山爆發，搞到歐洲航空大癱瘓，唔少留學生同遊客都受影響，連會計界立法會議員陳茂波（Paul）嘅囝囝James都受到牽連，趕唔切返英國牛津大學開學。阿Paul話復活節假期前，James本來諗住返香港陪屋企人，但阿Paul就叫佢應該趁後生見識多啲，提議James去吓旅行。於是James就同幾個同學一齊去土耳其伊斯坦堡玩，點知回程前遇着漫天火山灰，等極都未能撥開雲霧，最後要搭火車再轉船返英國。

James嘅回程路線非常曲折，佢首先要坐火車去羅馬尼亞，之後轉車到匈牙利布達佩斯，再西行至維也納，然後經阿姆斯特丹再坐船返英國。阿Paul話，James上星期一喺土耳其上車，到依家都未返到英國，連佢都唔知囝囝目前位置，好彩仲可以透過email同facebook聯繫，收到James報平安嘅訊息。