中環出更：吳清輝退休自駕遊法國

崇拜禮上，有逾百位應屆畢業生出席，吳清輝致辭時寄語學生要勇於面對挑戰，視挫折為歷練，咁苦口婆心，台下學生聽到眼濕濕，崇拜完畢後拉住校長合照，吳校長統統有求必應，仲約定班學生明年浸大五十五周年，要返嚟慶祝喎。

吳校長退休後有乜搞作？佢斬釘截鐵話唔會從政，亦冇打算從商，可能做啲研究都未定。賣身畀浸大廿五年，吳校長話最難忘係回歸後政府大幅削資，浸大有過一段困難時期，好彩已雨過天青嘞。辛苦多年，佢最恨同太太把臂同遊歐洲浪漫吓，七月就起程，諗住玩足幾個月先返香港。