政情：楊孫西巡茶展乜都影
第二屆香港國際茶展尋日閉幕，尋日亦係唯一一日開放畀公眾參觀嘅日子，我哋去湊熱鬧時，撞到福建幫頭領、全國政協常委兼中國茶文化國際交流協會會長楊孫西，佢自己拎住部單鏡反光相機左影右影，到底搞邊科呢？原來身為茶展搞手之一嘅楊孫西親力親為，影低茶展發生嘅大事小事，順便諮詢吓參展商意見，所有資料拎返去記錄存檔，等下年再搞好啲。
今屆茶展有超過三百個參展商參加，楊孫西話今年生意大致比往年好，而且唔少參展商都好滿意依家嘅安排，但有部分就希望三日嘅茶展，可以再開放多一日畀公眾參觀，等大家分享飲茶嘅樂趣。凡事都希望做到盡善盡美嘅楊孫西就強調，茶展主要目的係商貿，都會好好研究吓，迎合大家嘅需要。
Rita劉日飲普洱
十幾歲起開始歎茶嘅楊孫西仲推薦咗隻靚茶畀大家添。楊孫西話安徽鐵觀音係最靚嘅鐵觀音，製茶時用竹籬裝住茶葉，人手篩吓篩吓咁慢慢等佢發酵，過程中茶葉嘅邊皮會變乾，並轉為紅色；即使製成沖泡後，茶葉都會保持紅色邊緣，所以又名「綠葉紅邊」。
講開茶經期間，楊孫西仲巧遇啱啱為「國際金茶王」頒完獎嘅商務及經濟發展局局長劉吳惠蘭（Rita），兩個人仲即場歎番杯茶添。Rita由細到大都飲普洱，到今時今日都要每日飲一杯先夠喉喎！
