中環出更：吳文華電影籌款 撐基層「姊妹」
由立法會秘書長吳文華（Pauline）擔任會長嘅香港崇德社，早幾日舉行《影子滅殺令》慈善慶祝首映禮，呢套戲係今年二月獲得「柏林影展」銀熊獎最佳導演、奧斯卡金像導演波蘭斯基嘅最新作品，難怪嚟捧場嘅教育局局長孫明揚伉儷、基本法委員會副主任梁愛詩、「媽打」李麗娟、婦女事務委員會主席高靜芝等，個個都早早到場支持活動兼捧住爆穀等睇好戲。
Pauline兩年嘅會長任期下月期滿，佢好開心咁同卓妮講，已經將做會長之前訂立嘅目標超額完成，加上接手嘅第二副會長霍關天穎（Bonnie）又係有能力之人，所以Pauline都好相信香港崇德社未來可以繼續幫到更多姊妹。
霍關天穎接掌崇德社
好似今次佢哋搞呢個首映就籌咗超過一百萬元，幫六百名低收入嘅姊妹提供乳房X光造影檢查，又會幫一百名高危或者吸毒成癮嘅年輕女性建立正確自我價值，仲會有一個為期十個月嘅計劃，為貧困女士建立同增強人際關係網絡技巧。
除咗Pauline，第一副會長陳鄭小燕（Shirley）同第二副會長霍關天穎一樣都係「持家有道」之人，佢哋善用家中傭人嘅巧手，自製點心小食宴客，慳番多啲善款嚟幫人。不過一講到要接手做會長，陳太就話唔好，佢話自己嘅天分係做副手幫手統籌，所以會長呢個重任會由第二副會長霍太嚟做。
陳太雖然冇興趣接任做會長，但係佢老公、恒和珠寶集團主席陳聖澤同埋仔女、新抱、女婿嚟捧場，陣容鼎盛，相當溫馨。
溫馨嘅仲有崇德社執行委員會十四人，每人襟前都有一朵鑽石玫瑰花，朵花高貴又典雅，原來每朵盛惠八十大元。鑽石玫瑰證明價錢唔緊要，緊要嘅係意思同情意！