中環出更：抵諗CEO周松崗執垃圾

港鐵繁忙率之高，世界數一數二。尋日周日假期，周松崗微服出巡遊中環站，卓妮撞見佢嗰陣係中午食晏時間，佢拎住個手抽紙袋，喺售賣有機食品嘅「點點綠」前駐足觀看，呢身打扮，睇怕冇乜港鐵職員認得佢，周總亦樂於做回普通人，喺美食堆搜羅至愛，仲睇到入晒神添。

不過周總嘅眼光，好快就被行人通道上嘅垃圾吸引，佢一個箭步上前，諗都唔諗烏低身伸出右手，用二指神功將紙巾執起。呢一吓舉動，卓妮都嚇咗一跳！一個位高權重嘅CEO竟然紆尊降貴執垃圾，睇怕港鐵職員都應該向佢致敬嘞。

手執一張紙巾垃圾嘅周松崗見地上仲有一舊紙巾，一馬當先衝上去。	佢用二指神功，將垃圾執起。 （何偉鴻攝）	搵到垃圾桶，即刻丟入去。

執紙巾執到手軟

卓妮上前打招呼，周總顯得愕然，佢嘅表情話畀卓妮知，想搵垃圾桶丟咗手上執起嘅紙巾，卓妮熟晒地頭，話佢知垃圾桶喺前面。

其實周總唔係專登嚟執垃圾，原來佢約咗太太，諗住齊齊買有機食品返屋企玩煮飯仔。卓妮問佢點解咁抵得諗執垃圾，周總以笑回應，似乎唔想誇獎自己。咁抵得諗，卓妮都要寫個服字。

不過好戲還在後頭，正當卓妮講拜拜離開，以為周總打道回府，點知轉頭望多兩眼，原來佢繼續打雀咁眼，吓站內邊度有垃圾，望見廿米範圍內分別有兩張紙巾，三扒兩撥上前執埋佢。此情此景，試問有邊個港鐵職員見到唔肅然起敬？佢咁身先士卒，試問仲有冇人敢偷懶？

卓妮